Қазақстанның соңғы жаңалықтары

Павлодарда ұйқыбез ісігіне күрделі операция жасалды

24 Мамыр 2025, 22:27
347
Бөлісу:
 ҚР Денсаулық сақтау министрлігі
Фото: ҚР Денсаулық сақтау министрлігі

Павлодар қалалық №1 ауруханасында абдоминалды хирургиядағы ең күрделі операциялардың бірі – панкреатодуоденалды резекция сәтті өткізілді. Ұйқыбездің қатерлі ісіктерін емдеуге бағытталған хирургиялық араласу 4-5 сағатқа созылды, деп хабарлайды BAQ.KZ.

Ота медицина ғылымдарының докторы, профессор Болатбек Баймахановтың жетекшілігімен мастер-класс форматында жүргізілді. Бұл операция науқастың аурудан толық айығуына 20–30% жағдайда мүмкіндік береді, ал басқа жағдайларда өмір сүру сапасы мен ұзақтығын едәуір жақсартады.

Аталған жоғары технологиялық көмекті көрсету аурухана базасындағы Механикалық сарғаю орталығының жұмысы мен А корпусының қайта жаңғыртылып, заманауи медициналық жабдықтармен қамтамасыз етілуінің арқасында мүмкін болды. Бұған дейін мұндай диагноз қойылған пациенттер астана мен онкологиялық орталықтарға жіберілетін.

Мастер-класс қорытындысында Сызғанов атындағы ұлттық ғылыми хирургия орталығы, Павлодар облысының денсаулық сақтау басқармасы және №1 қалалық аурухана арасында үшжақты меморандумға қол қойылды. Құжат аясында тәжірибе алмасу, жаңа технологияларды енгізу, кадрларды даярлау және бірлескен ғылыми-практикалық жобаларды жүзеге асыру көзделген.

Өзгелердің жаңалығы
OSZAR »